گئدیشین گتیردی غمی ، غصه نی ،
قلبیم سئوه بیلمز داها کیمسه نی
هر گئجه رویامدا گورورم سنی ،
یوخومو آپارا بیلمه یه جک سن.
گئتدیین یوللارا حسرتله باخدیم،
دنیز تک کوکره ییب ، چای کیمی آخدیم.
منیمله قالاجاق بو قارا بختیم ،
بختیمی آپارا بیلمه یه جک سن.
گوناهین قارشینا چیخاجاق سنین ،
تنهالیق قلبینی سیخاجاق سنین ،
آهیم یاندیراجاق یاخاجاق سنی ،
آهیمی آپارا بیلمه یه جک سن.
گؤزومون یاشینی سیلسم ده بئله ،
سن سیز دردلی - دردلی گولسم ده بئله ،
من سنین دردیندن اؤلسم ده بئله
روحومو آپارا بیلمه یه جک سن...
نصرت کسمنلی
بایاتیلار
گمیم دریادا قالدی
ایشیم امدادا قالدی
اؤلمه یمه یانیرام
حییف یار یاددا قالدی
عزیزیم داشلی قالا
تورپاقی داشلی قالا
قورخورام دوشم اؤلم
یار گؤزو یاشلی قالا